टिजर सार्वजनिक भएपछि फिल्म ‘कार्साङ्ग’को हाइप राम्रै बन्ला भनेर सोचेको यसको निर्माणपक्ष अलमलमा छ । 

फिल्मको टिजरमा समावेश केही द्धिअर्थी संवादले दर्शक तान्ला भनेर अपेक्षा गरेपनि निर्देशक यम शेर्पा र उनको टिम यसका असफल भएको छ । यही कारणले गर्दा अहिले फिल्मको प्रचारमा यसका मुख्य कलाकार जितु नेपाल कुदिरहेको देख्न सकिन्छ । 

फिल्मको मुख्य भूमिकामा नायक दयाहाङ राई छन् । दयाकै अनुहार विकाएर केही देशमा अधिकार विक्री गरेको यसको निर्माणपक्षका लागि पौष २६ गते नजिकिदै जाँदा मुटुको चाल बढ्नुको स्वभाविक हो । किनकी, यो फिल्मको प्रचारमा दयाहाङ नै देखिएका छैनन् ।  दयाको सामाजिक संजाल हेर्ने हो भने  फिल्मलाई लिएर उनको उत्साह खासै देख्न सकिँदैन । बरु, फिल्मको प्रचारमा अर्का कलाकार जितु नेपाल  सक्रिय देखिएका छन् । उनको सामाजिक संजाल पनि यही फिल्मको प्रचार सामाग्रीले भरिएको छ । 

अर्कोतिर, दयाका रिलिज भइरहेका फिल्मको विषयवस्तु र लुक्स भन्दा बाहिर यो फिल्म जान सकेको देखिंदैन । यहीकारणले पनि दयाको एउटै अवतार कति हेर्नु भनेर सोच्दै आएका दर्शकका लागि यो फिल्मले आकर्षित गर्न नसकेको हो । 

एकातिर दयाले साथ नदिनु अर्कोतिर जितु एक्लै कुद्दा दर्शकको ध्यान केन्द्रित हुन नसक्नुले फिल्मको टिमलाई समस्यामा पारेको छ । यस्तो अवस्थामा दयाको हेरिरहेको लुक्स फेरि हेर्न दर्शक हलमा आउलान् त भन्ने प्रश्न खडा भएको छ ।