फागुनको १४ गतेबाट रिलिजमा आउन लागेको फिल्म ‘मायाबी’को प्रचारमा नायक पल शाह लागिपरेका छन् । यो फिल्म पलको करिअरका लागि पनि महत्वपूर्ण छ । यसैले, त उनले आफू पुग्ने हरेकजसो महोत्सवमा फिल्मको पनि आक्रामक प्रचार गरिरहेका छन् ।

पश्चिम नेपालका अधिकांश शहरदेखि गाउँमा आयोजना भइरहेको महोत्सवमा पललाई हेर्न दर्शकको भिड उर्लिएको छ । एक लाखसम्म दर्शक महोत्सवमा पललाई हेर्न आएको देखिन्छ । उक्त महोत्सवमा पुगेर पलले फिल्मको गीतमा नृत्य गरिरहेका छन् । दर्शकलाई टिसर्ट वितरण गरेका छन् भने फिल्मको पोस्टर पनि उनले दर्शकलाई दिइरहेका छन् । अधिकांश ठाउँका दर्शकहरुले यो फिल्म हेर्नका लागि आफूहरू उत्साहित रहेको बताएका छन् । पलले पनि दर्शकको उत्साहले आफूलाई पनि उत्साहित बनाएको बताए ।

दिवाकर भट्टराईको निर्देशनमा तयार भएको यो फिल्ममा पल शाहको साथमा दीपिका प्रसाई, प्रशान्त ताम्राकार, सुशील सिटौला, करिश्मा श्रेष्ठ, समिम खान लगायतका कलाकारहरूको अभिनय छ ।