फोर नेसन्स कपको फाइतनलमा म्यानमारसँग २–० गोल अन्तरले पराजित भएपछि राष्ट्रिय महिला फुटबल टीमकी कप्तान एन्जिला तुम्बापो सुब्बाले दर्शकसँग माफी मागेकी छन् ।फेसबुकमा लामो स्टाटस लेख्दै उनले भनेकी छन्, ‘फेरि पनि हामी फाइनलमा चुक्यौं । कप्तानको रुपमा म सबै समर्थकसँग माफी माग्न चाहन्छु ।

’उनले थप लखेकी छन्, ‘मैदानमा उपस्थित १६ हजार दर्शकहरु र सधैं हामीलाई माया गर्ने करोडौं समर्थकहरु, हामीले तपाईंहरुले अपेक्षा गरको र चाहेको नतिजा दिन सकेनौं ।’नेपाल, म्यानमार, किर्गिस्तान र लेबनान सम्मिलित फोर नेसन्स कपको समूह चरणमा नेपालले म्यानमारसँग बराबरी खेले पनि उपाधिका लागि भएको निर्णायक भिडान्तमा पराजित भएको हो ।यससँगै नेपाली महिला फुटबल टिम विभिन्न प्रतियोगितामा १३ औंपटक उपविजेतमा सीमित भएको छ । उपविजेतामा सीमित भएपछि कप्तान तुम्बापोले दर्शकसँग माफी मागेकी हुन् ।उनले माफी माग्दै थप लेखेकी छन्, ‘म्यानमार हामीभन्दा धेरै बलियो टोली थियो । पहिलो हाफ राम्रो खेलेका थियौं, तर दोस्रो हाफमा मेरो पहिलो गोलको गल्तीका कारण गोल खान पुग्यौं । तपाईंहरूको समर्थनकै कारण महिला टोलीले यो पहिचान र अवसर पाएको छ । यसले हामीलाई अझ राम्रो गर्न प्रेरित गरेको छ ।

त्यसैले, आलोचनाभन्दा बढी, हामीलाई अझ धेरै अवसरहरू आवश्यक छन् । यस्तै प्रतियोगिताहरू र राम्रो संरचना भएको घरेलु महिला लिग आवश्यक छ।’आफूहरुलाई निरन्तर दर्शकहरुको साथ, माया र समर्थनको खाँचो रहेको भन्दै खेलाडीहरुलाई आलोचना नगरिदिन अनुरोध समेत गरेकी छन् ।अब नेपालले महिला एसिया कप र फिफा विश्वकपको छानोट खेल्नेछ । आगामी जुनमा हुने छनोट चरणको समूहमा शीर्ष बन्न सके मेपाल एएफसी वुमन्स कपमा छनोट हुनेछ ।