चलचित्र ‘अञ्जिला’को प्रचारका लागि एन्जिला तुम्बाप्पो सुब्बा काठमाडौं आइपुगेकी छन् । आज बिहान साढे १० बजे उनी ग्रिसबाट नेपाल आइपुगेकी हुन् । अब उनी ‘अञ्जिला’को प्रचारमा आफैँ हिँड्ने भएकी छन् । एन्जिला काठमाडौं, भक्तपुर, ललितपुर, काभ्रेलगायत मोफसलका हलमा दर्शक भेट्न जानेछिन् ।

आज काठमाडौं आइपुगेकी एन्जिला मंगलबार पुनः ग्रिस फर्किनेछिन् । उनी ग्रिसको फुटबल क्लबबाट व्यवसायिक फुटबल खेल्दै आएकी छन् । उनी पहिलो रोजाइकी गोलरक्षक हुन् ।“एन्जिला आएपछि हलमा दर्शकको थप चाप बढ्छ भन्ने हाम्रो अपेक्षा थियो,” निर्देशक मिलन चाम्स भन्छन्, “आजसम्म हामी प्रमुख कलाकारबिना नै चलचित्रको प्रचार गरिरहेका थियौँ ।” आज काठमाडौंमा समाजवादी मोर्चा र राजावादीको प्रदर्शन रहेकाले प्रचारमा केही अवरोध हुने देखिएको छ । ‘अञ्जिला’ राष्ट्रिय महिला फुटबल क्लबकी कप्तान तथा गोलरक्षक एन्जिला सुब्बाको बायोपिक हो । यसमा उनको बाल्यकालदेखि खेल जीवनसम्मको संघर्ष र सफलताको कथा प्रस्तुत गरिएको छ ।१३ दिनमा आठ करोड ७ लाख रुपैयाँ यो चलचित्रले ग्रसकलेक्सन गरिसकेको छ । चैत २९ गते रिलिज भएको चलचित्र ‘अञ्जिला’ उच्च अकुपेन्सीसहित चलिरहेको छ ।

चलचित्रका निर्माता प्रेमकुमार श्रेष्ठ हुन् । मिलन चाम्सले निर्देशन गरेको चलचित्रमा एन्जिलाको साथमा प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारको अभिनय रहेको छ ।