काठमाडौं । नेपाली सुन बजारमा आज शुक्रबार ऐतिहासिक मूल्य वृद्धिको नयाँ कीर्तिमान बनेको छ। छापावाल सुनको भाउ प्रतितोला २ लाख ६ सय रुपैयाँ पुगेको छ, जुन अहिलेसम्मकै सबैभन्दा उच्च मूल्य हो।

नेपाल सुनचाँदी व्यवसायी महासंघका अनुसार, अघिल्लो दिनको तुलनामा सुनको भाउ प्रतितोला १२ सय रुपैयाँले बढेको हो। यसअघि साउन २३ गते कायम भएको १ लाख ९९ हजार ४ सय रुपैयाँको रेकर्ड आज तोडिएको हो।

यस्तै, चाँदीको मूल्य पनि बढेको छ। अघिल्लो दिन २३५५ रुपैयाँमा कारोबार भएको चाँदी आज ५ रुपैयाँले बढेर प्रतितोला २३६० रुपैयाँ पुगेको छ। चाँदीको यो मूल्य पनि अहिलेसम्मकै उच्च हो।

महासंघले अन्तर्राष्ट्रिय बजारमा देखिएको अस्थिरता र मागको चापका कारण मूल्यमा यस्तो वृद्धि भएको जनाएको छ।