काठमाडौं । भारत र क्यानडाबीच पछिल्लो समय चिसिएको कूटनीतिक सम्बन्धलाई सुधार गर्ने संकेत देखिएको छ। दुवै देशले एकैपटक आफ्ना नयाँ उच्चायुक्तको नियुक्ति गरेका छन्।

भारतले अनुभवी कूटनीतिज्ञ दिनेश के. पटनायकलाई क्यानडाका लागि उच्चायुक्त बनाउने घोषणा गरेको छ। हाल स्पेनमा भारतीय राजदूत रहेका पटनायक चाँडै क्यानडामा कार्यभार सम्हाल्ने भारतीय परराष्ट्र मन्त्रालयले जानकारी दिएको छ।

त्यसैगरी, क्यानडाले पनि झण्डै एक वर्षदेखि खाली रहेको भारतस्थित उच्चायुक्तको पदमा क्रिस्टोफर कूटरलाई नियुक्त गरेको छ।

क्यानडाकी विदेश मन्त्री अनिता आनन्दले यो नियुक्तिलाई भारतसँगको सम्बन्ध सुदृढ गर्ने रणनीतिक कदमको रूपमा प्रस्तुत गरेकी छन्। उनका अनुसार, “नयाँ उच्चायुक्तले द्विपक्षीय सहकार्यलाई थप गहिरो बनाउने अपेक्षा गरिएको छ।”

गत वर्ष क्यानडामा सिख छुट्टावादी नेता हरदीप सिंह निज्जरको हत्या भएपछि भारत–क्यानडा सम्बन्धमा तनाव चुलिएको थियो। क्यानडाले उक्त घटनामा भारतको संलग्नता रहेको आरोप लगाएको थियो, जुन भारतले कडा रूपमा अस्वीकार गर्दै आएको छ।

त्यस घटनापछि दुवै देशले आ–आफ्ना कूटनीतिज्ञ फिर्ता बोलाएका थिए। भारतले पनि क्यानडाका छ जना कूटनीतिज्ञ निष्कासित गरेको थियो।

नयाँ उच्चायुक्तहरूको नियुक्तिसँगै दुई देशबीच चिसिएको सम्बन्धमा केही सुधार आउने आशा गरिएको छ।