काठमाडौं । अछाम जिल्लाको पञ्चदेवल विनायक नगरपालिका–८, सेलापानीस्थित चुरखोली टोलमा छाउगोठमा सुतिरहेका दुई जनाको भीरबाट खसेको ढुङ्गाले किचेर मृत्यु भएको छ भने एक जना घाइते भएकी छन्।

जिल्ला प्रहरी कार्यालय अछामका प्रमुख प्रहरी नायब उपरीक्षक (डीएसपी) ओमप्रकाश खनालका अनुसार, मृतकमध्ये एक जना सोही टोलकी ३५ वर्षीया निम खनाल र अर्की मङ्गलसेन नगरपालिका–६ निवासी गोरे भण्डारीकी सात वर्षीया छोरी कविता भण्डारी रहेकी छन्। उनीहरू आज बिहान छाउगोठमा सुतिरहेको बेला अचानक भीरबाट खसेको ढुङ्गाले किचेर घटनास्थलमै मृत्यु भएको हो।

घटनामा कविताकी आमा घाइते भएकी छन्। उनको स्थानीय स्वास्थ्यचौकीमा उपचार भइरहेको प्रहरीले जनाएको छ।

घटनाको थप अनुसन्धान तथा विवरण संकलनका लागि प्रहरी निरीक्षक टेकबहादुर देउवाको नेतृत्वमा प्रहरी टोली घटनास्थलतर्फ पठाइएको डीएसपी खनालले जानकारी दिए।