काठमाडौं । कोशी प्रदेश सरकारले स्विस सरकारको सहयोगमा ‘उदय’ परियोजना सुरु गरेको छ, जसको उद्देश्य प्रदेशका साना तथा मझौला व्यवसाय (SMEs) को प्रवर्द्धन गर्दै उद्यमशीलताको विकास गर्नु हो। परियोजनाबाट आर्थिक समृद्धिका साथै रोजगारी सिर्जनाको नयाँ अवसरहरू खुल्ने विश्वास गरिएको छ।

‘उदय’ परियोजनाअन्तर्गत स्वीकृत सेवा प्रदायकहरू मार्फत व्यवसाय विकास सेवा प्रदान गरिनेछ। साथै, रु ६० करोडको ग्यारेन्टी फन्डमार्फत करिब रु ८ अर्ब बराबरको कर्जा सुरक्षा गरिनेछ। यसैगरी, रु २८ करोडको च्यालेञ्ज फन्डमार्फत उद्यमहरूको प्रवर्द्धनात्मक र प्रतिस्पर्धात्मक क्षमता अभिवृद्धि गर्ने लक्ष्य लिइएको छ।

परियोजनाले बजारसम्बन्धी जानकारी दिन ‘इनफर्मेसन पोर्टल’ पनि सञ्चालनमा ल्याउनेछ। साथै, बिना धितो रु ३० लाखदेखि रु तीन करोडसम्म कर्जा उपलब्ध गराउने योजना रहेको छ, जसका लागि बैङ्क चयन प्रक्रिया अगाडि बढाइएको छ।

प्रदेश सरकारका अनुसार, परियोजनाले उद्यमशीलता अभिवृद्धिसँगै ठूलो मात्रामा रोजगारी सिर्जना गर्ने र आर्थिक संरचनालाई सुदृढ बनाउनेछ। परियोजनाको प्रभावकारी कार्यान्वयनका लागि आवश्यक कार्यविधि तयार भइसकेको छ र हाल परियोजना कार्यान्वयन चरणमा प्रवेश गरिसकेको छ।

परियोजना कोशी प्रदेशका १४ वटै जिल्लामा विस्तार गर्ने लक्ष्यका साथ अघि बढाइएको छ। विशेष गरी पहाडी क्षेत्रका साना तथा मझौला उद्योगलाई प्रवर्द्धन गर्दै बसाइँसराइ रोक्ने र नयाँ उद्योग स्थापना गर्न प्रोत्साहन दिने प्रदेश सरकारको नीति रहेको छ।

परियोजनाको पहिलो चरण चार वर्षको हुनेछ, जसबाट करिब ३,००० जनालाई प्रत्यक्ष रोजगारी दिने लक्ष्य राखिएको छ। व्यवसाय विकास प्रमुख विष्णु काफ्लेले परियोजना १० वर्षसम्म सञ्चालन गर्नेगरी तयारी गरिएको जानकारी दिनुभयो।

उदय परियोजनाका टोली नेता अरुण राणाले परियोजना नयाँ उद्यम गर्न चाहने र हाल उद्यम गरिरहेकाहरूलाई लक्षित गरी सञ्चालन गरिने जानकारी दिनुभयो। मुख्यमन्त्रीका आर्थिक सल्लाहकार डा. मोहन सुवेदीले परियोजना प्रदेशलाई आर्थिक दृष्टिले नयाँ उचाइमा पुर्‍याउने बताउनुभयो।

मुख्यमन्त्री हिक्मतकुमार कार्कीको पहलमा सुरु गरिएको यस परियोजनालाई प्रदेशको एक महत्वाकांक्षी कदमको रूपमा हेरिएको छ। उहाँले परियोजनालाई कोशी प्रदेशमा नमूना बनाइ देशव्यापी रूपमा उदाहरणीय बनाउने प्रतिबद्धता व्यक्त गर्नुभयो।

मुख्यमन्त्री कार्कीले पर्यटन र कृषिमा प्रदेश सरकारले विशेष ध्यान दिएको उल्लेख गर्दै, पदमार्गमा आधारित पर्यटन विकास अन्तर्गत चारवटा नयाँ पदमार्ग निर्माण कार्य भइरहेको जानकारी दिनुभयो। उहाँका अनुसार, उदय परियोजनामार्फत नवउद्यमशीलता प्रवर्द्धन कार्यक्रमले प्रदेशको समृद्धिमा ठूलो योगदान पुर्‍याउनेछ।

आर्थिक मामिला तथा योजनामन्त्री रामबहादुर राना रानाले परियोजना सञ्चालनसँगै बजार प्रवर्द्धनदेखि नयाँ उद्योग स्थापना हुने वातावरण बन्ने धारणा व्यक्त गर्नुभयो।

यस परियोजनामार्फत कोशी प्रदेशको आर्थिक विकास, रोजगारी सिर्जना र समृद्धिको नयाँ अध्यायको सुरुवात भएको विश्वास गरिएको छ।