काठमाडौं । बैंकिङ कसूरमा फरार रहेका तीन जना प्रतिवादीलाई प्रहरीले बुधबार विभिन्न स्थानबाट पक्राउ गरेको छ।

पक्राउ पर्नेमा धनुषा मिथिला नगरपालिका–८ घर भई हाल भक्तपुर नगरपालिका–१ सिर्जनानगर बस्ने ४२ वर्षीया अम्बिका कुमारी रिजाल, सर्लाही बरहथवा नगरपालिका–७ घर भई हाल काठमाडौं गोकर्णेश्वर नगरपालिका–८ आरूबारी बस्ने ३५ वर्षीय विक्रम कुमार दमाई, र बैतडी पाटन नगरपालिका–६ घर भई हाल काठमाडौं कागेश्वरी मनोहरा नगरपालिका–९ काँडाघारी बस्ने ४३ वर्षीय जय सिंह भण्डारी छन्।

उनीहरू बैंकिङ कसूरसम्बन्धी मुद्दामा अदालतबाट पक्राउ पुर्जी जारी भई फरार रहेका थिए। काठमाडौं उपत्यका अपराध अनुसन्धान कार्यालय, टेकुबाट खटिएको टोलीले अम्बिकालाई भक्तपुरको सिर्जनानगरबाट, विक्रमलाई काठमाडौंको कलंकीबाट, र जय सिंहलाई कोटेश्वरबाट पक्राउ गरेको हो।

पक्राउ परेका तीनै जनालाई सम्बन्धित प्रहरी कार्यालयमा पठाइएको छ। अम्बिका कुमारी रिजाललाई जिल्ला प्रहरी परिसर काठमाडौं, विक्रम कुमार दमाईलाई प्रहरी वृत्त बौद्ध, र जय सिंह भण्डारीलाई जिल्ला प्रहरी कार्यालय कैलालीमा अनुसन्धान तथा आवश्यक कारबाहीका लागि पठाइएको प्रहरीले जनाएको छ।