काठमाडौं । पर्सामा पछिल्लो एक साता यता वीरगन्ज महानगरपालिका र पोखरिया नगरपालिकाका अस्पताल र स्वास्थ्य संस्थाहरूमा झाडापखाला र हैजाका बिरामीको संख्या ७१२ पुगेको छ। तीमध्ये ५१७ बिरामी उपचारपछि डिस्चार्ज भएर घर फर्किसकेका छन्, जबकि १९५ बिरामी अझै विभिन्न अस्पतालहरूमा उपचार गरिरहेका छन्।

स्वास्थ्य कार्यालय पर्साले शनिबार बिहान सार्वजनिक गरेको एक प्रेस विज्ञप्तिमा जनाइयो कि, हालै मात्र ७७ नयाँ बिरामी स्वास्थ्य संस्थामा आएका छन्। अहिले ३३ जना बिरामी आइसियुमा, ४ जना एचडीयूमा र १५८ जना सामान्य वार्डमा उपचार भइरहेको छ।

पर्सामा आरडिटी परीक्षणबाट १६२ जनामा हैजा संक्रमण पुष्टि भएको छ। यसमध्ये १०१ जना बिरामी उपचारपछि डिस्चार्ज वा अन्यत्र रिफर गरिएका छन् भने ६२ जना अझै विभिन्न अस्पतालहरूमा उपचार गरिरहेका छन्।

स्वास्थ्य कार्यालयको अनुसार, साउन २८ गते वीरगन्जको तराई अस्पतालमा झाडापखालाका बिरामी देखिन थालेका थिए र भदौ ५ गते पहिलोपटक हैजाको संक्रमण पुष्टि भएको थियो। यसपछि स्थानीय तह र संघीय स्वास्थ्य निकायहरूसँग मिलेर नियन्त्रणका लागि तीव्र प्रयासहरू गरिएको छ। जनचेतना अभियानका लागि रेडियो सन्देशहरू, रिक्सा माइकिङ र घरदैलो अभियानहरू पनि सञ्चालन गरिएको छ।

भदौ ७ गते स्वास्थ्य कार्यालयको पहलमा वीरगन्ज महानगरपालिकाका नगर प्रमुख, प्रमुख प्रशासकीय अधिकृत र स्वास्थ्यकर्मीहरूको बैठकको निर्णयअनुसार २२ वटा टोली जनचेतना फैलाउने र ५ वटा टोली तथ्याङ्क सङ्कलन गर्ने उद्देश्यले गठन गरिएको छ। यसका अतिरिक्त, प्रदेशको आपूर्ति व्यवस्थापन केन्द्रबाट आरडिटी किट र औषधिहरू अस्पताल र स्थानीय तहमा वितरण गरिएको छ र थप किट र औषधिहरूको आपूर्ति व्यवस्थापनको लागि समन्वय भइरहेको छ। प्रकोपका कारण पत्ता लगाउन पानीका नमुनाहरू सेन्ट्रल ल्याबमा पठाइएका छन्।