काठमाडौं । प्रधानमन्त्री केपी शर्मा ओलीले चिनियाँ राष्ट्रपति सी चिनफिङसँग पछिल्ला दुई वर्षमा लगातार दोस्रो पटक भएको भेटप्रति खुशी व्यक्त गरेका छन्। शांघाई सहयोग संगठन (एससीओ) सम्मेलनमा सहभागी हुन चीन भ्रमणमा रहेका प्रधानमन्त्री ओलीले राष्ट्रपति सीसँगको द्विपक्षीय भेटलाई फलदायी ठहराएका छन्।

प्रधानमन्त्री ओलीले भेटपछि सामाजिक सञ्जाल एक्समा लेख्दै नेपाल र चीन बीचको द्विपक्षीय सहयोग र सहकार्यको प्रगतिको समिक्षा गरिएको बताएका छन्। उनले भने, “दुई वर्षमा लगातार दोस्रो पटक राष्ट्रपति सी सँग भेटेर फलदायी द्विपक्षीय वार्ता गर्न पाउँदा खुसी लागेको छ। हामीले विभिन्न विषयमा भएको प्रगति समिक्षा गर्यौं र द्विपक्षीय सहकार्यलाई अझ प्रगाढ बनाउन सहमति जनायौं।”

त्यसैगरी, प्रधानमन्त्री ओलीले राष्ट्रपति सीलाई एससीओ प्लस शिखर सम्मेलनको निम्त्याएकोमा धन्यवाद पनि दिएका छन्। एससीओ सम्मेलन भोलि उत्तरी चीनको तियान्जिनमा सुरु हुँदैछ, र प्रधानमन्त्री ओलीले यस सम्मेलनमा पर्सी सम्बोधन गर्नेछन्।