काठमाडौं । वीरगञ्जमा हैजाको संक्रमण तीव्ररूपमा फैलिन थालेपछि सरकारले तीनै तहका सुरक्षाकर्मीहरूलाई नियन्त्रणका लागि परिचालन गर्ने निर्णय गरेको छ। प्रधानमन्त्री केपी शर्मा ओलीले शुक्रबार संसद्मा सम्बोधन गर्दै उक्त जानकारी दिएका हुन्।

उनका अनुसार मन्त्रिपरिषद्को बैठकले स्वास्थ्य मन्त्रालयको समन्वयमा नेपाली सेना, नेपाल प्रहरी र सशस्त्र प्रहरीका चिकित्सक, स्वास्थ्यकर्मी र उपकरणसहितको टोली परिचालन गर्ने निर्णय गरेको हो।

“यस रोगलाई छिटोभन्दा छिटो नियन्त्रण गर्न, बिरामीलाई निको पार्न र संक्रमण थप नफैलियोस् भनेर तीव्ररूपमा प्रयास भइरहेको छ,” प्रधानमन्त्री ओलीले भने।

सरकारले हैजाको स्रोत पत्ता लगाउने प्रयास पनि गरिरहेको बताउँदै उनले ढल, खानेपानी वा अन्य सम्भावित माध्यमबाट रोग फैलिएको हो कि भन्नेबारे छानबिन भइरहेको जानकारी दिए।

उनका अनुसार, रोकथाम, उपचार र निदानको प्रक्रिया प्रभावकारी बनाउन स्वास्थ्य मन्त्रालयको नेतृत्वमा समन्वित प्रयास भइरहेको छ।

प्रधानमन्त्री ओलीले हैजा तथा झाडापखालाका औषधिहरू सरकारले नि:शुल्क उपलब्ध गराइरहेको उल्लेख गरे। नारायणी उपक्षेत्रीय अस्पतालमा संक्रमितको नि:शुल्क उपचार भइरहेको पनि उनले जानकारी दिए।

कोरोनाकालमा नेपाली सेनाले बनाएको अस्थायी अस्पताल प्रयोगमा ल्याएर पनि थप उपचार सुविधा विस्तार गर्ने तयारी गरिएको उनले बताए।

प्रधानमन्त्री ओलीले दिएको जानकारीअनुसार अहिलेसम्म वीरगञ्जमा हैजा र झाडापखालाबाट संक्रमितको संख्या ६२४ पुगेको छ। तीमध्ये ४३७ जना उपचारपछि घर फर्किएका छन् भने १८७ जना अस्पतालमा उपचाररत छन्। पछिल्लो २४ घण्टामा मात्रै ८४ जना नयाँ संक्रमित थपिएका छन्। हालसम्म यस संक्रमणका कारण ३ जनाको ज्यान गइसकेको छ।