काठमाडौं । प्रतिनिधिसभाको बिहीबारको बैठकमा नेकपा एमालेका सांसद किरणकुमार साहले वर्तमान गृहमन्त्रीको कार्यशैलीप्रति कडा आलोचना गर्दै आफूलाई एक महिनाका लागि गृहमन्त्री बनाउन चुनौती दिएका छन्।

रौतहट लगायत देशभर भइरहेका हत्या घटनामा सरकार अनुसन्धान गर्न चुकेको आरोप लगाउँदै उनले गृहमन्त्रीकै असक्षमताका कारण देशमा अराजकता फैलिएको बताए।

“यदि गृहमन्त्रीसँग सरकार चलाउने आँट र योजना छैन भने मलाई एक महिनाका लागि गृहमन्त्री बनाइदिनुहोस्,” सांसद साहले भने, “म देखाउँछु सुशासन भनेको के हो। संविधान र कानूनको कार्यान्वयन कसरी गर्ने भन्ने कुरा व्यवहारमा उतारेर देखाउँछु।”

उनले बलियो स्वरमा थपे, “यो कुरा सुन्दा हाँसो लाग्न सक्छ, तर म नायक फिल्मको हिरोझैँ सफल हुन सकिन भने यही सदनमै राजीनामा दिन तयार छु।”

सांसद साहले जुनसुकै शक्तिशाली व्यक्तिसँग जोडिएका भए पनि अपराधीलाई उन्मुक्ति नदिने प्रतिबद्धता व्यक्त गरे। “अब जनताको रगतसँग खेलवाड सहन सकिन्न,” उनले भने, “संसद स्वयंले यसको जिम्मेवारी लिनुपर्छ।”

सांसद साहको यो भनाइले सत्तापक्षभित्रैबाट सरकारको आलोचना चुलिँदै गएको संकेत मिलेको छ।