काठमाडौं । काठमाडौंको जडिबुटीमा रोकिराखिएको बसमा स्कुटर ठोक्किँदा स्कुटरमा सवार दुई युवकको मृत्यु भएको छ।

शुक्रबार बिहान २:५० बजे जडिबुटीस्थित आकाशे पुल नजिक सडक छेउमा पार्क गरिएको बा.प्र. ०१–००६ ख ४२४३ नम्बरको अरनिको यातायातको बसमा कोटेश्वरबाट जडिबुटीतर्फ गइरहेको लु ४३ प ४९३८ नम्बरको स्कुटर ठोक्किएको हो।

बसको पछाडिपट्टि ठोक्किँदा स्कुटर चालक र पछाडि सवार व्यक्ति दुवै गम्भीर घाइते भएका थिए। घाइते दुवैलाई तत्काल ट्रमा सेन्टर पुर्‍याइएको जिल्ला प्रहरी परिसर, काठमाडौंका प्रवक्ता एसपी अपिल बोहराले जानकारी दिए।

उपचारका क्रममा स्कुटर चालक २२ वर्षीय शिरिस पौडेलको बिहान साढे ३ बजे र पछाडि सवार २३ वर्षीय नितेश नेपालको बिहान ३:४७ बजे मृत्यु भएको चिकित्सकहरूले घोषणा गरेका थिए।

पौडेलको स्थायी घर नवलपरासीको सुनौल–१ मा रहेकामा हाल भक्तपुरको लोकन्थलीमा बसोबास गर्दै आएका थिए। नेपालको घर काभ्रेपलाञ्चोकको पाँचखाल–२, होस्के हो।

घटनापछि बस चालक दोलखाको भिमेश्वर नगरपालिका–७ स्थायी घर भइ हाल काठमाडौंको काँडाघारीमा बसोबास गर्ने २५ वर्षीय सुभाष तामाङलाई प्रहरीले नियन्त्रणमा लिई आवश्यक अनुसन्धान थालेको छ।