काठमाडौं । अख्तियार दुरुपयोग अनुसन्धान आयोगले सरकारी जग्गा व्यक्तिको नाममा पारेर करोडौं रुपैयाँको आर्थिक अनियमितता गरेको अभियोगमा नापी अधिकृत सुग्रीव यादवविरुद्ध भ्रष्टाचार मुद्दा दायर गरेको छ। आयोगले यादवविरुद्ध ५ करोड ७९ लाख ६२ हजार ४४० रुपैयाँ विगो माग गर्दै विशेष अदालत, काठमाडौंमा आज आरोपपत्र दर्ता गरेको हो।

रुपन्देहीको भैरहवास्थित नापी कार्यालयमा कार्यरत यादवले आफ्नो पदको दुरुपयोग गर्दै सार्वजनिक जग्गाहरू व्यक्तिको नाममा मिलान गराएको आयोगको अनुसन्धानबाट खुलेको छ।

अख्तियारका अनुसार यादवले विभागीय प्रमुख र राजनीतिक व्यक्तिहरूको प्रभाव प्रयोग गरी कार्यालय प्रमुखको दरबन्दी खाली राखेका थिए। साथै, विदेश अध्ययनका लागि गएका कर्मचारीको दरबन्दी कायम राखी दश वर्षसम्म ‘निमित्त’ कार्यालय प्रमुखका रूपमा कार्यभार सम्हाल्दै सार्वजनिक सम्पत्तिमा अनियमितता गरेका थिए।

उनले सार्वजनिक पद सम्हालेको २०५३ साल असार १३ गतेदेखि २०९१ साल असार १६ गतेसम्मको अवधिमा ९ करोड ३ लाख ९५ हजार ४४४ रुपैयाँ आम्दानी गरेको देखिएको छ। तर, सोही अवधिमा उनले १४ करोड ८३ लाख ५७ हजार ८८४ रुपैयाँ बराबरको खर्च र लगानी गरेको पाइएको छ। त्यसअनुसार, उनले स्रोत नखुलेको ५ करोड ७९ लाख ६२ हजार ४४० रुपैयाँ बराबरको सम्पत्ति खर्च वा लगानी गरेका छन्।

आयोगले यादवका नाममा मात्र होइन, उनकी श्रीमती र छोराहरूका नाममा रहेको सम्पत्ति पनि शंकास्पद देखिएको भन्दै ती सम्पत्तिहरू जफत गर्न विशेष अदालतसमक्ष माग गरेको छ।

अख्तियारले यादवको कार्यकालमा गरिएको सम्पत्ति आर्जन, सार्वजनिक पदको दुरुपयोग, र अनियमित सम्पत्तिको उपयोगबारे थप अनुसन्धान अघि बढाउने जनाएको छ।