काठमाडौं । काठमाडौं महानगरपालिका प्रमुख बालेन्द्र साहले ३३ औं महानगर प्रहरी दिवसको अवसरमा नगरप्रहरीलाई राज्यका सुरक्षा संस्थाहरूसँग समन्वय र सहकार्य गर्दै काम गर्नुपर्नेमा जोड दिएका छन्।

उपस्थित सम्बोधन गर्दै उनले कानुन र नीतिहरूको पालनामा सक्रिय रहन नगरप्रहरीलाई आग्रह गरे। उनले भने, “महानगरमा अतिक्रमण हटाउने, सार्वजनिक सम्पत्ति संरक्षण गर्ने र सुशासन कायम राख्ने काममा महानगर प्रहरीको भूमिका महत्त्वपूर्ण छ। म यसको सराहना गर्दछु।”

कार्यक्रममा उपप्रमुख सुनिता डङ्गोलले महानगर प्रहरी बललाई कुनै व्यक्ति विशेषको हितमा नभई जनता र संस्थाको भलाइमा काम गर्न निर्देशन दिइन्। उनले भनिन्, “महानगर प्रहरीले सधैं जनतालाई ध्यानमा राखेर, पर्व र जात्रामा जनतासँगै रहने असल प्रतिनिधिका रूपमा काम गर्नुपर्छ।”

नेपाल प्रहरीका अतिरिक्त महानिरीक्षक टेकबहादुर तामाङले नेपाल प्रहरी र महानगर प्रहरी बलबीचको सहकार्यका बारेमा जानकारी दिँदै अनधिकृत संरचना र सडकपेटीको अतिक्रमण हटाउने काम प्रभावकारी रूपमा भइरहेको बताए।

महानगर प्रहरी बलका प्रमुख राजु पाण्डेले पनि अनधिकृत संरचना हटाउने, विपद् व्यवस्थापन र सवारी व्यवस्थापनका कार्यहरूमा नगरप्रहरीको योगदानको जानकारी दिए। उनले भने, “महानगर प्रहरी बलले सार्वजनिक स्थानमा धूमपान नियन्त्रण, सडकमा छाडिएका चौपाया हटाउने र विपद् व्यवस्थापनका कार्य पनि गर्दै आएको छ।”

यस अवसरमा महानगर प्रहरी बलले स्वयम्भूनाथ र वसन्तपुर दरबार क्षेत्रमा सरसफाइको कार्यक्रम चलाएको थियो भने, विभिन्न स्थानमा वृक्षरोपण पनि गरेको थियो।

महानगर प्रहरी बलको स्थापना २०५० सालको भदौ महिनामा भएको हो र अहिले ३६२ जना कार्यरत छन्। गत वर्ष प्रहरी बलले २० हजार ७३४ सवारीधनी र ३९७ जनालाई नियम उल्लङ्घनको आरोपमा कारबाही गरेको छ, जसबाट महानगरलाई रु ३ करोड ५६ लाख राजस्व प्राप्त भएको छ।

यस अवसरमा “महानगर प्रहरी गौरव” पुरस्कार वरिष्ठ निरीक्षक लक्ष्मी महर्जनलाई दिइएको थियो, “उत्कृष्ट महानगर प्रहरी” पुरस्कार हवल्दार बालकृष्ण कार्कीलाई र “महानगर प्रहरी पुरस्कार” हवल्दार विजय तामाङ, मणिराम खनाल र प्रहरी जवान फिलिपी सारु मगरलाई प्रदान गरिएको थियो।