श्रम रोजगार तथा सामाजिक सुरक्षा मन्त्रि शरतसिंह भण्डारीले खाडीमूलकमा रहेका नेपाली श्रमिक मुलुकको लागी शक्ति भएको बताएका छन् । ‘खाडी तथा मलेसियामा कार्यरत नेपाली मुलुकमा नै फर्किने हो । उहाँहरु आफ्नो करार सकिएपछि फर्कनुहुन्छ । त्यहीँ नै स्थायी बसोबास गर्ने होइन,’ उनले भने,‘उहाँहरु फर्कँदा रेमिट्यान्स मात्रै नभएर सीप, पुँजी र प्रबिधि पनि लिएर फर्किराख्नुभएको छ,’ उनले भने ।

श्रम मन्त्री भण्डारीले पछिल्लो एक दशकमा ६० लाख नेपालीले श्रमस्वीकृति लिएको बताए । ‘यो ६० लाख सबैजना विदेशमा छैन । यसमा करारपत्र समाप्त भएर ६५ प्रतिशत फर्केर आफ्नै मुलुकमा काम गरिरहेको अध्ययनहरुले देखाएको छ,’ उनले भने,‘यसरी फर्केर आएका श्रमशक्तिले मुलुकको आर्थिक र सामाजिक बिकासको लागि योगदान दिइरहेका छन् ।’