भारतीय क्रिकेट बोर्ड (बीसीआईले) पाकिस्तान भ्रमण नगर्ने भनेपछि भारतका खेल यूएईमा गरिने भएको हो ।आईसीसी च्याम्पियन्स ट्रफी २०२५ मा भारतका खेलहरू युनाइटेड अरब इमिरेट्स (यूएई)मा हुने भएको छ । च्याम्पियन्स ट्रफीको आयोजना अधिकार पाकिस्तानले पाएको छ । पाकिस्तान क्रिकेट बोर्ड (पीसीबी)का अध्यक्ष मोहसिन नाक्भी र यूएई क्रिकेट बोर्डका अध्यक्ष सेख नहयान अल मुबारकबीच भएको भेटघाटपछि यस्तो निर्णय गरिएको हो । “पीसीबीले यूएईलाई तटस्थ भूमिका रूपमा छनोट गरेको छ,” पीसीबीका प्रवक्ता अमिर मिरले भने ।

निर्णयानुसार भारत र पाकिस्तानबीचको खेल आउँदो वर्षको फेब्रुअरी २३ मा हुनेछ । भातरले समूह चरणमा पाकिस्तानबाहेक, न्युजिल्यान्ड र बंगलादेशविरुद्ध पनि प्रतिस्पर्धा गर्नेछ । भारतका यी सबै खेल दुबईमा हुने सम्भावना उच्च छ । च्याम्पियन्स ट्रफीको साविक विजेता समेत रहेको पाकिस्तानले फेब्रुअरी १९ मा न्युजिल्यान्डविरुद्ध खेल्दै प्रतियोगिताको सुरुआत गर्नेछ । यो खेल पाकिस्तानको कराचीमा हुनेछ । पाकिस्तानले यसअघि सन् २०१७ मा भारतलाई हराउँदै च्याम्पियन्स ट्रफीको उपाधि जितेको थियो ।